" Манас " таануу

Манастын жоокерлери менен Көкөтөйдүн азасына жөнөгөнү

                     Барабан согуп дүңгүрөп,

                     Баатырдын эли күңгүрөп,

                    Тозоңун тоодой бурдуруп, 

                    Тууну тууга урдуруп,

                    Сурнай кулак тундуруп,

                   Керней үнү бапылдап,

                   Жезнай тартып такылдап,

                   Чылмардан согуп шакылдап       

                   Асабасы жалпылдап,

                   Айчыктуу туулар жаркылдап,

                   Сандыргалуу кырк бөрү,

                   Санатын айтып көрөлү:

                   Баатырлардын баары бар,

                   Бакай абаң дагы бар,

                  Эр Алмамбет баатырдын

                  Жайланып турган чагы бар.

                  Күлдүрдүн уулу Чалыбай,

                  Күлдүргүчү Ажыбай,

                  Кыргыздан кыраан Кутунай.

                  Кара токо Мажиги,

                  Камбарбектин Чалиги,

                  Саргыл бийдин Сатайы,

                  Ардалыктын Атайы,

                  Үйшүндөрдүн Үмөтү,

                   Үмөт уулу Жайсаңы,

                   Аргын Каракожосу-

                   Акылга бирге кошосу,

                   Бообек, Шаабек, Шүкүрү,-

                   Болумдуу экен пикири,

                   Арбандардын Алтайы,

                   Дөрбөндөрдүн Төртайы,

                   Төлгөчү кара Төлөгү-

                   Төлгөсү журттан бөлөгү,

                   Агыдай далы көрүүчү- 

                   Ашкере айтып берүүчү

                   Топ башчысы Токотой,

                   Кырк башчысы Кыргыл  чал,

                  Эл башкарган Эламан,

                   Калк текшерген Калкаман,

                   Аздырбай айыл бийлеген,

                   Ат жыгылып турганча

                   Алтымыш акыл сүйлөгөн

                    Жапырагы алтын бай терек-

                     Сандыргалуу эр Серек,

                    Ал өнөрү болбосо,

                   Айтып бизге не керек.

                   Сундурса найза тартпаган,

                   Качып жоодон кайтпаган,

                   Кашындагы кан Сыргак   

                   Коңгуроолуу байдын Кош Абыш,

                  Кош башкарган эр Ыбыш.

                  Алымдын уулу Алакен,

                  Аярдын бири ал экен,

                 Арстан Мажик бар экен.

                 Караңгыда жол жүрсө,

                 Карсактын изи жаңылбас.

                 Кадыр, Жайнак, Шууту бар.

                 Түмөн кыргыз жол жүрсө,

                 Түлкүнүн изин жаңылбас,

                 Түмөн, Жайнак, Шууту бар,

                 Казактардан Жоорунчу,

                 Кайгыл, Бөгөл, Тоорулчу,

                 Шыңгынын уулу Кербени,

                  Шыпты кашка  Дөрбөнү,

                  Бөрү жолдуу Бөгөлү-

                  Жоону алыстан көргөнү,

                  Ырчы уул, Боз уул ыктуусу,

                  Эр Тазбаймат мыктысы

                  Аскер жүрсө бир жакка,

                  Асаба алып чыкчуусу.