Отчёт кыргыз тил

Отчёт

Белгилүү бир мөөнөткө пландаштырылган иштердин, тапшырмалардын аткарылышы, кызматка жана илимий иш сапарлардын жыйынтыгы тууралуу маалымат берүүчү расмий иш кагазы – отчёт. Отчётту кызматкер жетекчинин наамына жазат.

Отчётту жазууда эмнелерге көңүл буруу керек:

• отчёттогу маалыматтар так, ишенимдүү болушу талап кылынат;
• отчётто аткаруу үчүн тапшырылган же пландаштырылган иш, аны аткарууда эмнелерге көңүл бурулганы, эмнелер аткарылбай калганы, кандай кемчиликтерге жол берилгени, эгер иш аткарылбай калса, аткарылбай калышынын себептери, кемчиликтерди жоюунун жолдору сунуш катары белгиленет;
• отчёт колдо же компьютерде жазылат. Ал аркылуу аткарылган ишке, иштин аткарылыш сапатына баа берилет. Натыйжада отчёттун жыйынтыгы боюнча кызматкерлер сыйланат же жазаланат.

Отчёттун тилдик өзгөчөлүктөрү:

– уюмдун, жердин, адам аттарынын расмий түрдө жазылышы;

– көп маанилүү тилдик бирдиктердин керектелбестиги;

– сандардын цифра жана сөз менен берилиши;

– I жана III жакта даярдалышы, иш кагазынын редакцияланбашы;

–“ жөнүндө” сөзү менен иш кагазынын атынын байланыштырылышы;

Отчётко мүнөздүү концеляризмдер: текшерилди, аткарылды, каралды, аныкталды, тапшырма берилди, ... деген жыйынтык чыгарылды, ... деген тыянакка келдик, эске алынды, эскертилди, кошумча убакыт берилди, дагы бир текшерүүдөн өткөрүү керек, сунуштайбыз, сурайбыз, өтүнөбүз .

Отчёт тексттинин мазмунуна карай мезгилдүү иштер, иш сапары жана атайын тапшырма отчёттору болуп бөлүнөт.

Мезгилдүү иштер отчёту өндүрүштүк тапшырмалардын аткарылышына арналып жазылат. Бул отчётто цифралар, түрдүү номенклатуралык кыскартуулар, ондук бөлчөк сандар ж.б. кеңири колдонулат. Өзгөчө маалыматтык технология өнүккөн учурда таблицалар, диаграммалар кеңири пайдаланылышы мүмкүн.

Ишсапары отчёту уюмдун өкүлү өндүрүштүк же илимий максатта кызмат сапарында болгондо жазылат. Мындай отчёт акча каражаты менен байланышта болгондуктан, мекеме жетекчилиги тарабынан бекитилет.

Атайын тапшырма отчёту - мекеме жетекчиси адисти башка бир мекемеге кандайдыр бир өндүрүштүк жагдайды үйрөнүп келүү же атайын максаттуу ишсапарына жибериши мүмкүн. Белгилүү максат менен иш сапарына барган адис же кызматкер мекеме жетекчилигине атайын тапшырма отчётун тапшыруусу зарыл.

Атайын тапшырма отчётунда жетекчилик тарабынан адиске тапшырылган милдеттер, кандай чечилгени конкреттүү сыпатталып берилиши керек. Аткарылбай калган тапшырмалардын себептери көрсөтүлөт.

Атайын тапшырма отчёту мекеменин ишмердигинин багытын аныктап, жамааттык түрдө түзүлүшү да мүмкүн. Отчёттор бир нускада даярдалып, мекеменин атайын папкасында сакталат.