Проектная деятельность

Хүнэй наһан соо гэр бүлэһөө үнэтэй сэнтэй юумэн юун байхабдаа. Гэр бүлэ хадаа- хүнэй эгээл шухала юумэн – эндэ бидэ урганабди, һуранабди, эндэ маанадые хүлеэдэг, манда дуратай байдаг.

Гэр бүлын үнэтэй сэнтэй юумэнүүд хадаа – баримта бэшэгүүд, дурдалга, бэшэгүүд, шангууд болоно. Энэ наһанай гэршэ, түрэлхидэймнай ажал.

Би ехэл омгорхоноб! Иимэ эбтэй, ажалша, томо бүлэдэ үргэгдэжэ ябаһандаа. Гурбан наһатайһаань Түнхэнэй аймагай Шэмхэ тосхондо Кириченко Светлана Дагбаевна, һанаха һарбайха эжытэй болоһондоо баяртайб. Бултадаа дүрбэн үхибүүдые өөһэдынгөө үхибүүд шэнги хүмүүжүүлдэг. Энэ минии эгээл дүтын, түрэл хүнүүд гээшэ. Би түрэл урагайнгаа түшэг тулга ехэ һайн мэдэрнэб. Минии эжы, нагасанар намайе ямаршье ажалда нарин һайнаар, үнэн сэхэ, шударгуу һайнаар һургана. Энэ ажал дүүргэхэдээ буряад зоной, бүлынгөө ёһо заншалнуудые мэдэжэ абааб. Тиигээд иимэ зорилгонуудые табиһан байнаб. Гэр бүлынгөө түүхэтэй танилсаха. Айл ахадүүмни ямар ажамидаралтай, ажалтай бэ гэжэ мэдэхэеэ һанааб.

Дахинаа, минии бүлэ ехэ томо, эбтэй, олонациональна. Бүлымнай бүридэл иимэ болоно- буряадууд, таджигууд, украинцууд, ородууд болоно. Жэшээлхэдэ, бидэ ородшье, буряадшье найрнуудые гэртээ үнгэргэдэгбди. Пасхада нагасанартаа шанаһан үндэгөөр наншалдахаа ошодогбди. Сагаалганда эжынгээ амтатай бууза, шанги эдидэгбди. Хүгшэн эжымни Сыбыкова Пагба Сыбеновна, ехэ олон һонин түүхэнүүдые хөөрэдэг һэн. Хүгшэн эжымнай ажалай ветеран, ара талын герой болоно. Мянга Юһэн зуун хорин зургаан ондо Түнхэнэй аймагай Туран тосхондо түрэһэн юм. Хоёр наһатайдань эжы абань наһа бараад, түрэлхидынь үргэжэ абана. Дүрбэдэхи класс Монгой эхин класс дүүргээд, арбан дүрбэн наһатай болотороо гэрэй ажал хэдэг байгаа һэн. Мянга юһэн зуун дүшэн онһоо “Дзержинскын” нэрэмжэтэ колхоздо хонишоноор ажаллажа эхилээ. Тэрэ хүндэ хүшэр үедэ Агууехэ дайнай эхилхэдэ арбан табатай байгаа бэлэй. Хаража байһан хонидоо зуун ерэн табан толгой болгожо, зуун зургаан процент түсэбөө дүүргээ. Түрүүшын шанда, аяар зургаан хони бэлэг болгон абаа. Арбан найман наһатайдаа аймагай залуу крестьянска съездын делегатаар һунгагдаа. Тэрэ үедэ “За самоотверженный труд в тылу” гэжэ медальда хүртөө. Арбан жэл хонишоноор ажаллаһанайнь удаа хүгшэн эжымнай һаалишанаар совхоз “Саянскада” худэлжэ наһанайнгаа амаралтада гараа. Олон орден медальнуудтай “Ажалай ветеран”, “Материнская слава” нэгэдэхи степени, “За доблестный труд в годы Великой Отечественной Войне”, “Агууехэ дайнай үедэ габъяата ажал” хэһэнэй түлөө.

Мүнөө үедэ бүхы долоон үхибүүдынь эжынгээ наһан соогоо хэжэ ябаһан ажалынь дамжуулһан зандаа. Ларионов Александр Викторович нагасамни, мянга юһэн зуун жаран зургаан оной. Наяад оноор “Туранай” совхозой түрүү һаалишанарай нэгэн байһан юм. Бага наһанһаань эжытэеэ хүндэ, фермын ажал хэжэ һураһан, урагшаа зоригтой, алтан гартай хүн болоно. Арбан дүрбэтэйһээнь эжынгээ ажал үргэлжэлүүлжэ, залуушуулай комсомольско бригадын ударидагша байгаа. Эрхим һаалишан байһанайнь түлөө гүрэн путевконуудые Средни Ази, Румыни, Болгарида бэлэглээ. Мүнөө олониитын ажал ябуулгадаг – нютагайнгаа депутат, эдэбхитэйгээр туһалбариин ажахы ажалтай. Түнхэнэй аймагай олон грамотануудта хүртөө “За развитие и укрепление подсобного хозяйства”, “За лучшее личное подсобное хозяйство”. Нагасанарни мүнөө табан үхибүүды үргэжэ абаад хүмүүжүүлдэг.

Үнэхөөрөө, хүн бүхэнэй наһан соо эгээл шухала хэрэгтэй – бүлэ болоно гээшэ. Бүлэ – хадаа хүнэй наһан, ажалай һургуули ха юм. Гэр бүлэ соо эгээл наһанаймнай һонин, гоё, һанаа амар үдэрнүүд үнгэрдэг.