Şen ol, Eni yıl!

ŞEN OL, ENİ YIL

Saabi, brak derindän o uykuyu,

Çıkar dünnä yortusuna duyguyu

Sabaadan horoz ta haber verer,

Kaar elektän pamuk sepeler.

Kardaş – gelin, eni yılı karşılayalım,

Yılda şen baarışa sarmaşalım

Neetimizi artık şansora kuralım,

İstemizdä şen üzlän kaavi duralım.

Eni yılı geldik biz sizinnän beklemää,

Bilä ana – dilindä şiir eklemää

Gelin ortak olalım kamçiya,

Seläm götürelim bizim amucaya.

Kapunuza şen etişsin Eni yıl,

Onun nasaatına hȇy-hȇy barmaa bil.

Hepsimiz bu gündä şen sevinelim,

Sıcak el yortuya verelım.

Hȇy-hȇy!

Gökteki boba yıla versin yaşlık,

Tamtur başak gözä olsun şaşlık,

Tavannar innesin mayıl terekedän –

Allah vergisi kalkana erkendän.

İi ömür, baaşış yılda uşaklara

Kaba ekmek sıymaz sacaklara

Ekmek olsun kaba bizim boyunca Etişsin Kiriyet küüyünä doyunca.

Saraydan beygir atlı fırlasın,

Ona baka gençlär şen hallansın.

Yılı hoş – gelmeli dartsın ileri-

Canavarda kalsın hassietin izleri.

Çan sesi sevinç getirsin evinizä

Ürektän zamandan şennik kefinizä

Kamçıyı olur kuvetä erä uralım,

Halı yortuya karşı şen kuralım.

İkram, şarap filcanda saalınıza,

Şevk edelim uygun olsun mallarınıza.

Eni yıl kutluca gelmeli olsun,

Maalemiz bu yıl gelinnän dolsun.

Hep dik dursun dedenin kalpaa,

Olmasın yannış yola sapmaa,

Olsun baalı belindän kuşak,

Bakıp, mayıllı kalsın uşak.

Kamçı çimçirik gibi çatlasın,

Kim yortuya buyurmaz patlasın

Buva sesi ötsün bütün maaleya,

Gayda olur saldırsın saliya.

Hȇy-hȇy!

Ötsün daul dolaya sesindän,

Uyansın saabi şen kefindän.

Malar şennik tutsun bu gün- Pişman halı olmasın süngün.

Pençerä çiçää şen oyunu gözelletsin,

Sevda çöşmesi şennik eletsin,

Kauş sesi gülüş bizä kopartsın,

Sizä da şennik bir parça artsın.

Kemençä buyur etsin ii oynamaa,

Olur şennik artık bet kayınana

Karışsın Eni yıla Batikalar

Gelsin fikirä şaş «Katikalar».

Maalemiz bu gündä kalsın mayıllı,

Kız – çocaa versin çotrayı kayıllı.

Sizdän pembä yanak brakılmasın –

Yıl üzündä kara bez dakılmasın.

-------------------------------------------------------------------------------------------

Şarap bu avşam çotrada oynaşsın –

Filcän dökülü hepsinä danışsın,

Yılın saalık veresinä aldanalım,

Kahırı cendem yoluna daadalım.

Aydınnık olsun yılda şılak,

Öpüş dünnedä bitmesin aşlak.

Fener bütün yıl şavk etsin –

Ömür şennik, kısmet bizä versin.

Gelän yılda gelindä belli olsun,

İçer şımarık sestä dolsun, Haseet bu yıl şkembedän çatlasın,

Betva zihiri gölünä olur atlasın.

Gençlär bütün yıl sevişsin,

İhtiar ana-bobaya gelişsin,

Genä bir sestä şennik kuralım –

Yıl şaşkınıyna kamçı uralım,

Hȇy-hȇy!

Kutlaylım Eni yılı sabaa duunca,

Avaları şen kuşlar ii kurunca,

Gürlesin şenniktän bizim maalä.

Nışan kalsın kär gagauz ayleyä.

Saabi, çıkar ödek bizä çalannara,

Karşı Eni yılı kutluca olannara

Saabiyka, çıkar birkaç kolaç.

Unutma kesedä yıla kadar ilaç.

Hadi, kardaş, genä biz gidelim,

Kaç para verceklär işidelim,

Zere kafadarlar bizi hep bekler,

Ana – dilindä hȇy-hȇy taa ekler –

Hȇy-hȇy!

Ya çocuklar, kaç kişi varsınız –

Hȇy-hȇy yortuya karşı baarınız,

Derin sestä naara edelim olannara,

Şaş-beş kalsın yortu golannara. Hȇy-hȇy! Şiirin avtoru: Miti (Kasım) Guboglu Çadır kasabası.