Стихотворение "Родной язык"

Ана тил

Анам йимик аявлап,

Ана тилим сюемен.

Ана тилин билсин деп,

Яшлагъа дарс беремен.

Халкъ хазнасын сакълама

Бары гючюмню саламан.

Билмеслеге билдирме

Дарман излей къаламан.

Ана тилим –къумукъ тил.

Женнетни тили йимик.

Язбашында топлангъан

Толгъан солакъ бал йимик.

Гьар-бир сёзю тилимни-

Кёкде янар юлдузу.

Ана тилин бек билсе,

Ярыкъ болажакъ юзю.

Къумукъ тилни агъымы
Жанынга шатлыкъ бере.

Дюньяны бар байлыгъы –

Тилинг унутма , вёре!

Эльмира Исаева

Оьтемиш юрт

ДИРО, мастер-класс оьтгереген вакътиде , 2017 йыл февраль ай,

Мадина Минатуллаева –кафедраны ёлбашчысы, филология илмуланы кандидаты;

Муаллимлер: Супьяханым, Маржанат ,Нурият, Саламат, Зумруд, Зарипат, Гюлженнет,Эльмира.

Ана тил.

Ана тил! Бу эки де сёз анадан сонг, гьар адамгъа дюньяда лап да тарыкъ, лап да ювукъ сёзлердир.

Ана тилибиз – бизин жан азыгъыбыз, багьасы ёкъ хазнабыз.

Къумукъ тил – асил, сабур тил. Сабурлукъ буса ойдан, гьисден гьакъылгъа ювукъ. Гьакъылдан буса тува асил къылыкъ, эдеплик, инсанлыкъ.

Ана тилде сёйлейген адамны юреги рагьмулу, сёзю гьакъыллы, юзю гёзел боламы экен деп ойлайбыз.

Яшланы юрегине ана тилге бакъгъан сююв къакъакъ йыр булан синген. Бешикдеги яшына рус тилде яда башгъа тилде къакъакъ айтагъан ананы гёз алгъа гелтирмеге болмайбыз.

Бугюн школаларда юрюлеген ана тил ва адабият дарслар нечик даражада салынгъанлыкъ охувда аслу ерни тута.

Бизге,муаллимлеге, дарсларда охувчуда оьз элин сююв, эдеп, къылыкъ, гёзеллик, табиатны якълав, инче саният ойланы уятма тюше, яшларда наслудан наслугъа бериле гелген асил хасиятланы уьлгюлерин уьйретме тарыкъ, чеберликни гьислерин сездирме герек бола.

Сонг да, яшавгъа гёре болуп турагъан янгылыкълагъа гёре « янгы девюрню яшларына» гьар тюрлю техноглогияланы къоллап, къужурлу дарслар оьтгерме тюше.

Гелигиз, биз, ана тилибизни аяйыкъ, ону гёзеллигин, асиллигин сезейик!