Викторина "День космонавтики"

КОСМОНАВТИКА КҮНҮГЭР АНАЛЛААХ
ВИКТОРИНА
БОППУРУОСТАРА УОННА ЭППИЭТТЭРЭ
1. Ханнык куорат Ю.А. Гагарин аатынан уларытыллан ааттаммытай?
Эпп.: Ю.А. Гагарин төрөөбүт куората Гжатск.
2. Аан дойдуга бастакынан аһаҕас космоска тахсыбыт космонавт аата.
Эпп.: 1965 с. бастакынан аһаҕас космоска тахсыбыт космонавт Алексей Архипович Леонов.
3. 3 төгүл космоска көппүт космонавы ааттаа.
Эпп.: Валерий Федорович Быковскай (1963, 1976, 1978 сс.).
4. Ю.А. Гагарин аата ханнык үөрэх тэрилтэтигэр иҥэриллибитэй?
Эпп.: Ю.А. Гагарин аата Монино куоракка Кыһыл Знамялаах Байыаннай академияҕа, о.д.а. үөрэх тэрилтэлэригэр иҥэриллибитэ.
5. 2011 с. республика биир хаһыатыгар "Сулустаах куорат Саргылааната" диэн очерк тахсыбыта. Очерк геройун толору аатын ааттаа уонна кини космонавтикаҕа сыһыанын туһунан сырдат.
Эпп.: 2011 с. И. Ущницкай "Сулустаах куорат Саргылааната" диэн очерката "Орто дойду" хаһыакка муус устар 7 к. бэчээттэммитэ. Онно Амма улууһуттан төрүттээх, психолог идэлээх, РФ президенин иһинэн РАГС-ка аспирантураҕа үөрэммит, психологическай наука кандидата, Звезднай куоракка космонавтары бэлэмниир научнай-чинчийэр-тургутар кииҥҥэ психологическай лаборатория начальнигынан үлэлиир Саргылаана Егоровна Захарова туһунан суруллубута.
6. Юрий Гагарин саамай таптыыр ырыатын ааттаа.
Эпп.: 2011 с. Ю.А. Гагарин сиэн балта Наталья Борисовна Гагарина Германияҕа Ю.А. Гагарин кэриэһигэр анаан "Я люблю тебя, жизнь!" диэн Россия аныгы үйэ маастардарын быыстапкатын тэрийбитэ. Быыстапка ырыа аатынан ааттаныыта мээнэҕэ буолбатаҕа. Бу Юрий Алексеевич саамай таптыыр ырыата этэ. Ырыа тылын Константин Ваншенкин, мелодиятын Эдуард Колмановскай 1956 с. суруйбуттара.
7. Космос куйаарыгар бастакынан көппүт Ю.А. Гагарин ийэтигэр Анна Тимофеевнаҕа аналлаах памятник Саха сирин кытта туох сибээстээҕий?
Эпп.: 2001 с. Смоленскай уобалас Гагарин куоратыгар Ю.А. Гагарин ийэтигэр Анна Тимофеевнаҕа аналлаах памятнигы туруоруу саха бастакы Президенэ М.Е. Николаев идеята этэ.  Скульптурнай үлэ авторынан саха художнига, П.А. Ойуунускай аат. СР Государственнай премиятын лауреата, Арктикатааҕы  культура, искусство институтун доцена Эдуард Иннокентьевич Пахомов буолбута.
8. Якутскай куоракка 1992 с. арыллыбыт мемориал-комплекс кимнээххэ анаммытай?
Эпп.: 1992 с. алтынньытыгар Ю. Гагарин болуоссатыгар Саха сирин авиатордарыгар мемориал-комплекс арыллыбыта. Комплекска Гагарин бюһа, АЛСИБ-ка аналлаах стела, Р-39 "Аэрокобра" самолет макета киирэр. Манна Жатай аттыгар саахалламмыт Б-25 бомбардировщик экипаһа хараллан сытар. Автордар-Э. Пахомов, В. Бушуев, И. Шишигин.
9. Иван Пантелеймонович Габышев, Валентин Капитонович Иванов, Василий Васильевич Семенов. Бу 3 саха киһитин туох сибээстиирий?
Эпп.: 3-н Ньурбаттан төрүттээхтэр, барыларын Москваатааҕы байыаннай-салгын академията ситимниир.
10.  2011 с. Германияҕа ыытыллыбыт норуоттар икки ардыларынааҕы быыстапкаҕа Саха сириттэн художник-дизайнер, норуот маастара Анна Зверева ханнык үлэлэринэн кыттыбытай?
Эпп.: Быыстапка Ю.А. Гагарин кэриэһигэр анаммыта. Манна Анна Зверева "Дьөһөгөйгө сүгүрүйүү", "Булгуруйбат санаа" диэн саҥа үлэлэринэн кыттыбыта.