Բացահայտելով կյանքի հրաշքները.
Որտեղի՞ց են ծագել մարդիկ, կենդանիներն ու բույսերը, ինչու՞ են տարբեր արարածներ իրենց տարբեր կերպ դրսևորում, ինչպիսի՞ կառուցվածք ունի մարդու մարմինը, ո՞րն է հիվանդությունների առաջացման պատճառը, որտե՞ղ կա կյանք: Կենսաբանությունը գիտություն է կյանքի մասին: Այն ուսումնասիրում է կյանքի դրսևորումները, կենդանի օրգանիզմների բոլոր ձևերի (վիրուսներից մինչև մարդ) կառուցվածքը, գործառույթները, ծագումը, զարգացումը, տարածվածությունը, կապը միմյանց և շրջակա միջավայրի հետ: Ֆիզիկայի, քիմիայի և այլ գիտությունների նվաճումների ու հետազոտման եղանակների լայնորեն օգտագործումը հանգեցրեց մոլեկուլային կենսաբանության հիմք հանդիսացող կենսաքիմիա, կենսաֆիզիկա գիտությունների ձևավորմանը: Տիեզերագնացության սկզբնավորմանը զուգահեռ ծնվեց տիեզերական կենսաբանությունը, որի հիմնական խնդիրն է մարդկանց կենսապահովումը տիեզերական թռիչքների պայմաններում, նաև կյանքի դրսևորումների որոնումն այլ մոլորակներում: Կենսաբանական հետազոտությունների գործնական նշանակությունը չափազանց մեծ է հատկապես բժշկության համար, որն այսօր արագորեն զարգանալով օգնում է ավելի ու ավելի շատ կյանքեր փրկել, ձերբազատվել հիվանդություններից և աշխարհը դարձնել ավելի առողջ: