Бабан чIал

Халкьдин уьмрин мяна багъри чIал, меденият, аьдатар, хусусият уьбхбаъ а, фицики дурар адарш, халкьра гъубзурдар. Му фикрар сатIиди атIагна машгьур табасаран шаир Шамил Къазиевдин "Бабан чIал" шиъриъ.

Ш. Къазиев, "Бабан чIал"

Чюнгюр вува,

Халкьдин мухриин али,

Йиз багъри чIал,

Йиз аьзиз чIал.

ГучIурзуз вук

Кучуз… Мукьам кIваъ айи,

Гьякьлуб вуйкIан,

Даршиш – кучIал.

Халкьдин далу

Вуйва мучIу аьсрариъ

Аьгь гъапIунва

Фукьан балйир…

Ерхьуразуз

Яв симарин мукьмариъ

Читин деврин

Гьарйир, сузйир.

Фукьан гъерхьну

Гъубшу девриъ халкьариз

Яв симарин

Пашман мукьмар?

Фукьан ашкьар

Саб мяълийихъ эллериз

Гъушну, тувну

Чпин жанар?

Мяъли кIури

ГъакIну устад-сазандрар,

Уьбхюз ккунди

Яв ширин сес.

Гьадрар вуйин

МучIу девриъ ву гъюбхдар,

Йиз чIал – йиз рюгь,

Суфат, гьевес?

Аьсрарихьан,

ТIараш гъапIу халкь, Ватан,

Гъабхьундар

Уву апIуз тIанкь.

Читин девриъ

Шли фуж гъюрхнуш, йип аган:

Халкьди – уву,

Дарш уву – халкь?

Афалугъди

Кучраза яв симарик…

Ачухъ апIин сир яв гьенгнан –

Гъюз гъит йиз кIван

Аьшкьну ацIнай табариз

Саб лепе яв

Мукьмин гьюл’ан.