Да юбілею Дануты Бічэль

ДАНУТА БІЧЭЛЬ-ЗАГНЕТАВА нарадзілася 1 студзеня 1938 г. у в. Біскупцы Лідскага раёна Гродзенскай вобласці ў сялянскай сям'і. Скончыла Навагрудскае педагагічнае вучылішча, аддзяленне беларускай мовы, літаратуры і гісторыі Гродзенскага педагагічнага інстытута імя Я. Купалы. З 1962 г. выкладала беларускую мову і літаратуру ў школах Гродна. Член СП СССР. З 1982 г. загадчыца Дома-музея Максіма Багдановіча ў Гродна. У друку выступае з 1958 г. У вершах, арганічна звязаных з народна-паэтычнай традыцыяй, апявае Радзіму, жыццё працаўнікоў вёскі, прыгажосць роднай зямлі. Аўтар зборнікаў паэзіі «Дзявочае сэрца» (1961), «Нёман ідзе» (1964), «Запалянкі» (1967), «Доля» (1972), «Ты — гэта ты» (1976), «Браткі» (1979), «Дзе ходзяць басанож» (1983), «Загасцінец» (1985), «Даўняе сонца» (1987), «А на Палессі» (1990), «Божа, мой Божа» (1992), «Снапок» (1999), «На белых аблоках сноў» (2002), «Стакроткі ў вяночак Божай Маці» (2004), «Ойча наш…» (2008). Напісала паэмы і кнігі вершаў для дзяцей «Перапёлка» (1968), «Грыб-парасон» (1969), «Дзічка» (1971), «Рыжая палянка» (1971), «Дагані на кані» (1973), «Лузанцы» (1982), «Габрынька і Габрусь» (1985). Аўтар кнігі нарысаў, мемуараў і эсэ «Хадзі на мой голас» (Вроцлаў, 2008), выдала кнігу прозы «Мост святога Францішка» (2010).