Ուսուցիչների գնահատում

ՈՒՍՈՒՑՉԻ ԳՈՐԾՈՒՆԵՈՒԹՅԱՆ ԳՆԱՀԱՏՄԱՆ ՈՒՂԵՑՈՒՅՑ

Ուղեցույցի խնդիրներն են

• Ուսուցչի գործունեության գնահատումն իրականացնել դրական և ստեղծագործական մթնոլորտում, ինչն էլ իր հերթին կապահովի մասնագիտական շարունակական աճ և սովորողների կրթական ձեռքբերումների բարելավում:
• Տարբեր միջոցներով և եղանակներով խթանել ուսուցիչների ինքնազարգացումը և սրա շնորհիվ նաև դասավանդման արդյունավետությունը:
• Տեղին և ժամանակին հետադարձ կապ տրամադրել ուսուցիչներին՝ դասավանդման արդյունավետությունը և հաշվետու լինելու պատասխանատվությունը բարձրացնելու համար:
• Ուսուցչամանկավարժական անձնակազմը համալրելու, ընդլայնելու և վերակազմավորելու գործընթացին աջակցել:
• Կրթահամալիրի ռազմավարական պլանով նախատեսված նպատակների իրագործման ճանապարհին աշխատանքային խմբերի գործունեությանն աջակցել:

Ուսուցչի գործունեության գնահատման ուղեցույցը շեշտադրում է՝

• ուսուցչի մասնագիտական գործունեության և սովորողների ուսումնառության, գիտելիքների հիման վրա որոշակի կարողությունների ձեռքբերման գործընթացի միջև հարաբերակցությունը.
• ուսուցչի գործունեության յուրաքանչյուր ոլորտ որոշակի չափորոշիչներով և ցուցիչներով գնահատումը.
• ուսուցչի գործունեության բոլոր չափորոշիչների համար սանդղակների մշակումը, կազմումը և դրանցով առաջնորդումը.
• ուսուցչի գործունեության գնահատման համար բազմատեսակ աղբյուրների՝ փաստաթղթեր, դասալսումներ, ճեմարանի տարբեր ոլորտների պատասխանատուների դիտարկումներ, ուսուցչի թղթապանակ, աշակերտների և ծնողների կարծիք և այլնի կիրառումը:
• ուսուցիչների մասնակցությունը գնահատման գործընթացին (ինքնագնա հատում):

Ուսուցչի գործունեության գնահատման հիմնական դրույթները

• Ուսուցչի գործունեության գնահատման ուղեցույցի հիմքում ուսուցչի աշխատանքային գործառույթների նկարագրությունն է, որը և՛ ուսուցչի, և՛ գնահատողի համար հստակեցնում է սպասելիքները կատարվող աշխատանքից: Գնահատման ուղեցույցը ներառում է ուսուցչի գործունեության գնահատման 3 մակարդակները (բարձր, միջին, ցածր) որոշող 10 խումբ չափորոշիչներ, չափորոշչի ցուցիչներ և յուրաքանչյուր չափորոշչի գնահատման համար նախատեսված սանդղակներ:
• Ժամանակավոր աշխատանքային պայմանագրով աշխատող ուսուցիչների գործունեությունը գնահատվում է ամեն տարի, մինչև նրա հետ կնքվի անժամկետ աշխատանքային պայմանագիր, որից հետո՝ 3 ուստարին մեկ: Անժամկետ պայմանագրով աշխատող ուսուցիչների գործունեության գնահատումը իրականացվում է ուսումնական 3 տարին մեկ անգամ, ընդ որում՝ առաջին երկու ուսումնական տարիներին իրականացվում է ձևավորող գնահատում, իսկ երրորդին՝ ամփոփիչ գնահատում:
• Յուրաքանչյուր ուստարվա սկզբում դպրոցի գիտամեթոդական կենտրոնի և առարկայական հանձնախմբի կամ ամբիոնի ղեկավարները ուսուցչին ներկայացնում են գնահատման՝ սույն ուղեցույցով նախատեսված գործընթացի անհրաժեշտ մանրամասները: Տարվա ընթացքում ընդունված նոր աշխատակիցները ուսուցչի գործունեության գնահատման կարգին ծանոթանում են առանձին: