3-сынып 23-сабақ Еңбектің наны тәтті

Сабақ мақсаты: Жақсылық жасау арқылы ішкі тыныштыққа жету жолдары туралы түсініктерін кеңейту

Міндеттері: : Жақсылық жасау арқылы адам бойында туатын ішкі тыныштығын ояту;

                        Ақылдылыққа, шыдамдылыққа, төзімділікке,терең ойлауға, тек жақсылық жасай білуге тәрбиелеу;

Ресурстар:(құралдар, мәлiметтер) Ел аузынан. Шешендік сөздер, ақындық толғамдар, аңыз әңгімелер 1989 ж. Алматы «Жазушы» баспасы.288 бет, түсті қарындаштар, бояулар.

Сабақ барысы:

1. Ұйымдастыру кезеңi. Тыныштық сәтi. Нұрға бөлену
2. Үй тапсырмасын тексеру  . 1.Б.Досымов «Маңдай тер» мәтінін оқу

-Мәтіндегіатайдың іс-әрекетіне өз көзқарасыңды білдір.

-Өз еңбегінің жемісін көрген Хамиттің бойында қандай сезім пайда болды?

Сабақ барысын талқылау:

1. Дәйек сөз.

Бейнетің қатты болса,

Татқаның тәтті болар.

Халық мақалы

-Дәйексөздегі негізгі ой қандай?

- Жақсылыққа жетудің жолдарын қарастыр.

Дәйек сөздің мағынасын ашу, дәлелдеу, дұрыс қадам жасауға әрекет ету.

1. Әңгiмелеу (сұхбат).Балаларға сый

Аңыз әңгіме: «Базаршы жігіт пен ақылды қыз»Ертеде бір бидің жалғыз ұлы болыпты.Ақылдылығымен, әділдігімен ел аузына іліккен би ұлының болбыр өскеніне налиды. Бірде алыс сапар үстінде келе жатқан әке баласын сынамаққа «Қарағым, осы жолды қалай қысқартуға болады?» дегенде, аң-таң қалған ұлы мандыртып жауап бере алмайды. «Ой,жетесіз, әсерлі әңгіме айта білсең жолдың қысқарғаны сол!» деп қатты күйінген би ойланып-толғанып бір шешімге келеді.

   Бір күні ұлының алдына жүз саулық салып, базарға айдатады. Сапарға шығар алдында шартын айтады:

   -Балам,мына малды базарда ретін тауып үш рет сатып,пұл етерсің. Бір рет сатсаң сен маған ұл емессің, үйдің бетін көрме!..

   Әкенің қатал сынына ұшыраған бала малын айдап базарға келсе, сатып алушылар көп екен. Саулықтардың құнын сұраған халыққа:

  -Әр басты үш реттен сатамын, - дейді екен.

  -Оу, бір қойды үш рет сатқанды кімнен көріп едің? – деп таңырқаған жұрт теріс айналып кете беріпті.

  Күн артынан күн жылжып, малы өтпей, әбден қажып, шаршаған базаршы жігіт малының жанында бүктүсіп жата береді.

  Жігіттің мұң басқан жүзін көріп аяп кеткен бір жас қыз одан:

  -Неге сонша жабырқаусың? –деп сұрайды. Бала болған жайдың бәрін баяндайды. Сонда қыз былай депті:

  - Қорадағы малыңды үш рет сату үшін менің айтқанымды бұлжытпай орындауың керек.Алдымен анау орманнан ағаш қиып әкеліп, қора жаса. Қойды сонда ұста.Уақыт өткенде, мезгіл жеткенде қораң қойға толады, малдың жүні өседі. Сонан кейін қиды бір сат, жүнді екі сат. Малдың өзін және сат. Бір басты үш рет сату деген осы.

   Қыздың ақылына сүйсінген жігіт қуанып кетеді де, іске кіріседі:

Күнді –түнге ұластырып ерінбей тер төгеді де көп кешікпей-ақ қалтасын пұлға толтырып үйіне оралады.

  Ұлының олжалы оралғанына риза болған би оның мұндай ақылды кімнен үйренгенін анықтағысы келеді. Жігіт сырын жасырмай, шынын айтады.

   Би іздеу салып жүріп ақылына көркі сай сұлуды  ұлына әпереді. Би баласы мен ақылды қыз өз алдына отау тігіп, дәулетті әрі бақытты ұзақ өмір сүреді.

Сұрақтар: 1.Әкесі баланы сынау үшін қандай  талап қойды?

 2.Әке талабын орындауға кімнің көмегі тиді?

                3. Әке мен бала жүрегінде тыныштық орнады ма?

Әңгімені талдау, ой өрбіту, өмірлік сабақ алу.

1. Шығармашылық жұмыс, топтық жұмыс.

Оқушыларды 4 топқа бөлу. «Бояулар сыры»

Әр топ түсті бояулармен жан тыныштығын қайдан табуға болатынын бейнелеу және топта мағынасын ашу.

Топпен жұмыс кеңесіп, келісіп жұмыстану.

     6.Топпен ән айту. «Асыл әжем»

Сөзі: Қ.Мырзалиев

                                      Әні: Н.Тілендиев

Асыл әжем, ғасыр әжем аңсаған,

Сағынышым - сары ормандай самсаған.

Әке болып жүргенімді ұмытып,

Әлі күнге еркелеймін мен саған.

Құлындаймын асыр салған аңғарда,

Қозыңдаймын ойнақтаған албарда.

Өзің барда қысылмаймын күлуге,

Жылауға да қысылмаймын сен барда.

Мен өзіңнен қабылдаппын сүюді,

Мен өзіңнен қабылдаппын күюді.

Сенің жаның жүрегіме ораулы,

Менің жаным жаулығыңа түюлі.

Тұра тұршы түзелгенше бұзығың,

Жүре тұршы жалғанғанда үзігің.

Маған дәулет неге керек, ақ әже-ау,

Өзің бірге көре алмасаң қызығын?!

Топпен ән айту құндылықтарды білу, тыныштық, махаббат, қуаныш сезімдерін сезіну.

1. Үй тапсырмасы.

1. Дәптермен жұмыс. Ертай Ашықбаевтың «Маңдай тердің жемісі» өлеңін оқып, мазмұнына сай сурет салу

2.  «Алтын мүйіз» ертегісін оқып кел

Шығармашылықпен өз беттерінше жұмыстану.

1. Соңғы тыныштық сәтi. Нұрға бөлену

        Бір, екі, үш көзімізді жұмамыз. Әуен ырғағымен сабақта тыңдалған аңыз-әңгіменің мазмұнын көз алдымызға елестете отырып, бүгінгі сабақ әрқайсымыз үшін дұрыс әрекет жасауға, ақиқатқа көз жеткізе білуге, қиянат жасамай, сүйіспеншілікпен тыныштыққа бөленуге салынған сара жол екенін ұғынайық.

Сананы рухани құндылықтармен жетілдіру.