У адыгов обычай такой!

Хэбзэ дахэ щызэрахьэ.

Мыекъуапэ дэт к1элэц1ык1у 1ыгъып1эу зиномер бгъум «Жъогъобын» зэреджагъэхэр. Шъыпкъэмк1и, жъогъожъые зэфэшъхьафыбэу зыжъогъобын зэгуры1о-зэдэ1ужьэу к1элэц1ык1у 1ыгъып1эр мэпсэу. К1элэп1у 1эпэ1асэу, я1офш1эн агу етыгъэу мыщ щылажьэрэр бэ. Ц1ыф зэфыщытык1эм, дэхагъэм сабыйхэр фап1ух. Ахэм яхэгъэгу ш1у алъэгъуным, тыкъэзыуцухьэрэ дунаим идэхагъэ, ибаиныгъэ зэхаш1эным,ш1эныгъэ зэфэшъхьафхэм якъежьап1эхэр я1эрылъ хъуным емызэщыжьхэу, дэлажьэх. Ащк1э амалыш1ухэр агъэфедэх. Ежь сабыйхэм абзэ, язэхэш1ык1 пэблагъэу мэфэк1хэр, зыкъэш1ын-къэгъэлъэгъон ц1ык1ухэр, зэдэгущы1эгъухэр щызэхащэх. Зы гущы1эк1э къэп1он зыхъук1э, хэбзэ дахэ щызэрахьэ.

Мы илъэсми чъэпыогъу мазэм бжыхьэм фэгъэхьыгъэ зичэзыу мэфэк1 «Жъогъобыным» щырек1ок1ыгъ. Ар зыгъэхьазырыгъэхэр ык1и зезыщагъэхэр музыкальнэ 1офыш1эу Кудайнет Анисетрэ апшъэрэ группэм ик1элэп1ухэу Симбулэт Сарэрэ Тлинэ Саидэрэ. Апшъэрэ группэм ис к1элэц1ык1ухэу мэфэк1ым ибысымхэм бжыхьэм ехьыл1эгъэ орэдхэр дахэу къа1уагъэх, усабэхэм къяджагъэх. Къэгъэлъэгъоным къыхэлэжьагъэх Республикэ гимназиеу зиномер зым ик1элэеджак1охэу Хъуажъ Бэла, Сташъу Джанета, Гъыщ Суанда ык1и Хъут Мыхьамэт.

Нэужым «артист ц1ык1ухэми», ахэм зыкъызэраш1ыгъэр зыш1огъэш1эгъон дэдэу яплъыгъэ группэ нахьык1эхэм арыс к1элэц1ык1ухэми апае «Жъогъобыным» ик1элэп1оу Чуц Фатимэ къыгъэхьазырыгъэ презентациеу «Тидунай къэтыухъумэн» зыфи1орэр къыгъэлъэгъуагъ. К1элэц1ык1у 1ыгъып1эм ик1элэп1ухэу Хьапэк1э Саидэ бжыхьэм, Шорэ Аидэ к1ымафэм, Хъупсэрэкъо Нафсэт гъатхэм ык1и Нэгъэрэкъо Зурет гъэмафэм яхьыл1агъэу гъэш1эгъоныбэ сабыйхэм къафа1отагъ. А пстэури джэгук1э шъуашэм илъэу тыкъэзыуцухьэрэ дунаим узэрыфэсакъын фаер, псыхъуи, къушъхьи, мэзи, шъофи зэрар япхы зэрэмыхъущтыр сабыйхэм алъагъэ1эсыгъ. Хырыхыхьэхэр нахьыбэу зыш1эхэрэмк1э к1элэц1ык1ухэр зэнэкъокъугъэх.

Бжыхьэ дунаир зэрыдахэм фэдэу, дахэу, чэфэу, нэфынэу мэфэк1ыр сабыйхэм агу къинагъ.

Симбулэт Сар.

К1элэц1ык1у 1ыгъып1эу «Жъогъобыным» ик1элэп1у.