Сұр қоян тақырыбында сабақ

Білім беру саласы: Қатынас

Білім көзі: Тіл дамыту.

Тақырыбы: «Сұр қоян»

Мақсаты: Шағын өлеңді жатқа айту, сөйлеу барысында дауыс ырғағы мен қарқынын қадағалап, кейіпкердің бейнесін , мінез-құлқын дұрыс жеткізуге тәрбиелеу; қол мен саусақты жаттықтыруға ойындар мен ойыншықтарды пайдалануға іскерліктерін қалыптастыру.

Көрнекіліктер: көкөністер, бақша (макеті), атрибуттар.

Сөздік жұмыс: сыбдыр, ойлы-қырлы, томпаңдап.

Билингвалды компонент: қоян-заяц, түлкі-лиса, мысық-кошка.

Ұйымдастыру кезеңі:

Жылулық шеңбері:

Үлкенге де «Сіз»

Кішіге де «Сіз»

Баршаңызға құрметпен

Бас иеміз «Біз».

Өткен оқу іс-әрекетін қайталау:

-Қазір жылдың қай мезгілі?

- Қандай орман жануарларын білесіңдер?

Жұмбақ:

Сылдырдан қорқады,

Шошынып жортады.

(Қоян)

Ғажайып сәт:

Топқа қоян кіреді.

Қоян: Сәлеметсіңдер ме, балалар! Мені танисыңдар ма? Мен сендерге қонаққа келдім, сыйлық алып келдім. бірақ сыйлығымды маған өнерлеріңді көрсетсеңдер ғана берем.

Тәрбиеші: Қоян жабайы да ,үй жануары да болады. Қоянның түсі жаз мезгілінде сұр, ал қыс мезгілінде ақ болады. Жауларынан қорғану үшін ол түсін ауыстырып тұрады.

Қане балалар, қоянға өнерімізді көрсетейікші.

Қайшы құлақ қоянмын

Ақшыл түске боялдым.

Сытыр еткен бұтақтан,

Елең етіп ояндым.

Тәрбиеші: балалар,сендер шаршаған шығарсыңдар, денемізді сергітіп алайық.

Сергіту сәті.

Ұзын құлақ сұр қоян,

Естіп қалып сыбдырды.

Ойлы-қырлы жерлермен,

Ытқып-ытқып жүгірді.

Дидактикалық ойын: «Кім тапқыр?»

Ойын шарты: Суретте не бейнеленгенін атау, ол қандай жануар, олар қалай қозғалатынын айту.

Құс ұшады, жылан жорғалайды, ат шабады, бақа секіреді, балық жүзеді.

Дидактикалық ойын «Көкөністерді жинау»

Шарты: бақшада өсіп тұрған көкөністердің ішінен тек сәбізді қоянға жинап беру.

Қояндар биі .

Қоян: Жарайсыңдар , балалар! Сендер өнерлі де, тапқыр екенсіңдер. Менің сендерге арналған сыйлығым , қабыл алыңдар. Ал, енді мен орманыма қайтайын . Сау болыңдар!

Сұрақтар қойып, тақырыпты қорытындылау:

• Бүгін бізде топқа қандай жануар келді?

• Қандай жануар туралы өлең жаттадық?

• Қоян қандай?

Балаларды мадақтап, ұйымдастырылған оқу іс-әрекетін аяқтау.