Magtymguly jan içinde goşgy

29 bentden ybarat goşguda haýwanat dünýäsinden bilbil, ýarganat, anka, bezgek, durna, ishak, musyja, laçyn, turaç, ördek, gaz, tawus, kaknus, toty, keýik, gurt, at, ýaby, eşek, düýe ýaly guşlar hem-de haýwanlar özara aýdyşyp, hersi öz ýaşaýşyny beýan edýär:

«Bilbil aýdar: köşküm bar, Bahar gözleşigim bar, Gülzar üçin yşkym bar, Bagy-bossan içinde.

Anka aýdar: ýolçyýam, Hüthüt aýdar: ilçiýem, Süleýmana sawçyýam Ýalan jahan içinde.».

Magtymguly bu eserinde her guşy, her haýwany suratlandyranda, olar bilen bagly rowaýaty ussatlarça ýeke setire sygdyrypdyr. Mysal üçin, hüthütiň Süleýman üçin sawçy gidişini ol bir setirde düşündirýär.

Akademik Ýe.E.Bertelsiň bellemegine görä, Magtymgulynyň goşgusyndaky bilbil — awtoryň özi, laçyn — söweşiji, tawus — köşk näzenini. Bular öz dillerine düşünýän Süleýman pygambere arza gelýärler. Bularyň aňyrsynda sopuçylyk edebiýatynyň syrly öwrümleri beýan edilýär.