Уеннарның файдасы

Уеннар башлангыч мәктәптә аеуча зур роль уйный. Кече яшьтәге баланы һәрьяклап үстерүдә уен иң әһәмиятле чараларның берсе булып тора.

Уеннар аркылы балаларда батырлык, тапкырлык,җитезлек,чыдамлылык кебек сыйфатлар тәрбияләнә. Ватаныбзга, илебезнең иң яхшы кешеләренә мәхәббәт уята, аларга охшарга тырышу теләген үстерә. Уенда балаларның кызыксынучанлыгы, хәтере, игътибарлык, сөйләм телләре үсә. Шулай ук балаларның фикер йөртүләрен, фантазияләрен үстерүдә дә уенның әһәмияте аеруча зур. Уен ярдәмендә балаларны бер коллективка туплап була. Тату уйнарга, бер-берсенә булышырга өйрәнәләр. Хәрәкәтле уеннар балаларның физик яктан ныгуына, таза-сәламәт булуына, хәрәкәтләрнең һәм сизү органнарының үсешенә ярдәм итә.

Кем тизрәк җыелыр ?

Урамда яки иркен залда уйнала торган уен. Балалар ике төркемгә бүленә һәм төрле якка йөгерешеп китәләр. Команда бирелгәч, яңадан төркемнәргә җыелалар. Тизрәк җыелган төркем җиңүче була.

Төлке-тавык кетәклегендә.

3-4 озын эскәмия куела, ул тавыкларның кетәклеге була. Балалар арасыннан бер төлке сайланып алына. Ул качып тора. Шулай ук калганнар арасыннан бер әтәч сайлана, ул тавыклар белән бергә йөри. Алар бергә җим чүпләп йөриләр, канатларын кагалар.Кинәт әтәч кычкыра. Ул төлке килүен күреп ала. Тавыклар кетәклеккә менеп кача. Кача алмаган тавыкларн төлке тотып, үз оясына алып китә. Аннары яңа төлке сайлана.Уен шулай дәвам итә.