Алімпіядныя заданні па беларускай мове для 3 класа

Варыянт 1

1. Складзі ланцужок з трох-чатырох слоў такім чынам, каб кожнае наступнае слова пачыналася з апошняй літары папярэдняга. Апошняе слова ў ланцужку павінна закончыцца на першую літару першага слова.

Прыклады адказаў:

Работа, агурок, камар.

Кветка, адказ, знак, кошык.

2. Адгадай загадку-анаграму.

 Яна да мора цягнецца заўжды,

 Бяжыць, віляючы, управа, улева…

 Ледзь перастаў склады — і вось тады

 Адразу стане часткай дрэва. (Рака — кара)

У. Мацвеенка

3. Здагадайся, як казу ператварыць у насякомае.

Прыклад адказу: страха – ха + каза = страказа.

4. Адгадай загадкі.

 Вабіць нас яно заўжды

 Ягадамі, жытам,

 Звонкай свежасцю вады,

 Сонечным блакітам. (Лета)

А яна палоніць сном

 Луг, і сад, і поле,

 Пакрывае рэчку льдом,

 Снегам — наваколле. (Зіма)

М. Пазнякоў

5. Здагадайся, якіх слоў не хапае, і дапішы верш.

 Прынёс дзядуля капялюш,

 А капялюш — паўнюткі… (груш).

 Грушы — быццам на малюнку!

 Дзеці рады… (пачастунку).

М. Чарняўскі

6. Пра якія словы ідзе гутарка ў загадках.

 Яна — мана, ды ў ёй намёк,

 Добрым малайцам урок.

 А “З” на “С” мяняй і тут –

 Ужо вайсковы атрыбут. (Казка — каска)

У. Мацвеенка

7. Скончы прыказкі.

 Хто працуе, той… (не сумуе).

 Няма смачнейшай вадзіцы, як з… (роднай крыніцы).

8. Падкрэслі галоўныя члены сказа.

 Мыш злавіў кот.

9. Прачытай загадку.

 У яловіку кашлатым

 запішчалі птушаняты.

 Ды зімой, ды ў маразы!

 Што за птушка? — Адкажы! (адказ)

У. Паўлаў

Складзі адгадку — назву птушкі з прапанавах літар.

 БЮКРЫДЗЖА — … (крыжадзюб)

10. З літар слова парасон складзі як мага болей новых слоў. Адныя і тыя ж літары можна выкарыстоўваць некалькі разоў.

Прыклады адказаў: нара, пара, рапс, сон, нос.

Варыянт 2

1. Складзі ланцужок з трох-чатырох слоў такім чынам, каб кожнае наступнае слова пачыналася з апошняй літары папярэдняга. Апошняе слова ў ланцужку павінна закончыцца на першую літару першага слова.

Прыклады адказаў:

Атрад, доктар, раніца.

Аловак, кішэня, яблык, коўдра.

2) Адгадай загадку-анаграму.

 Яна верхам на канверце

 Раз’язджае па ўсім свеце.

 Але ў адзін момант ты

 У назве перастаў склады.

 І ўжо будзе злыдзень, мусіць –

 Раптам падляціць і ўкусіць. (Марка — камар)

У. Мацвеенка

3. Здагадайся, як слімака ператварыць у кветку?

Прыклад адказу: слімак – слі = мак.

4. Адгадай загадкі.

 Адна прыроду ажыўляе,

 У квецень дрэвы апранае

 І з поўдня цёплага дамоў

 Вяртае ластавак, буслоў… (Вясна)

Другая — ураджай збірае

 І хутка дрэвы распранае.

 Крылатых рупных жыхароў

 На поўдзень адсылае зноў. (Восень)

М. Пазнякоў

5. Здагадайся, якіх слоў не хапае, і дапішы верш.

 З гушчару, бліжэй да сцежкі,

 Выбягаюць… (сыраежкі)

 І абапал пазіраюць,

 Быццам грыбніка… (чакаюць).

А. Зэкаў

6. Пра якія словы ідзе гутарка ў загадках.

 Яна ў расе ў сенакос

 Штодня купае востры нос.

 Ледзь “С” на “З” змяні,

 Як хтосьці раптам скажа — б-е-е

 І малачко нясе табе. (Каса — каза)

Паводле У. Мацвеенкі

7. Скончы прыказкі.

 Дзе шчырая праца, там густа, дзе лянота — … (там пуста).

 Чалавек без Радзімы, што салавей… (без песні).

8. Падкрэслі галоўныя члены сказа.

 Сыр любіць мыш.

9. Прачытай загадку.

 У пагодлівы дзянёк

 Недзе з паднябесся

 Пералівісты званок

 Славіць працу песняй.

У. Паўлаў

Складзі адгадку — назву птушкі з прапанаваных літар.

 КАЖАЎРНА — … (жаўранак)

10. З літар слова каласок складзі як мага болей новых слоў. Адныя і тыя ж літары можна выкарыстоўваць некалькі разоў.

Прыклады адказаў: сок, сала, ласка, сокал.