Плиты Грисы баллада Авд цухъхъайы

мПлиты Грис уыди патриот æмæ стыр поэт. Йæ бирæ сфæлдыстадон куыстытæй дзæвгар фæхъæздыгдæр ирон культурæ, ирон аивад.

Поэты курдиат йæ тыхы бацыд хæсты азты. Грис хæцæг æфсады бавзæрста адæмы хъизæмар, æвдисæн уыд адæмы лæгдзинадæн. Уымæн бантыст хуызджын нывты хæсты трагизм равдисын, советон салдаты поэтикон фæлгонц саразын. Грисы салдат у патриот, намысджын хæстон. Поэт ын æргом кæны йæ хъæздыг миддуне, йæ национ удыхъæд, йæ бæрзонд идеалтæ. Плийы -фырт цаутæм кæсы лæмбынæг, арф сын иртасы сæ мидис, афтæмæй кæны философон хатдзæгтæ. Хæсты иутæ хæцынц пайдайы сæраппонд - ахæм хæст у стыр фыдракæнд; иннæтæ хæцынц Фыдыбæстæ æмæ сæрибары сæрвæлтау – уый у кады хъуыддаг. Грисы хæстон лирикæйы æрдзон хуызы баиу сты патетикæ æмæ зæрдæбын лиризм, бæрзонд трагизм æмæ фæлмæн юмор. Уыцы миниуджытæ йын дæттынц ахадгæ фидауц æмæ æвидигæ мидис.

Балладæ «Авд цухъхъайы» у ирон поэзийы хæзнатæй. Поэт ссардта ахъаззаг формæ, Фыдыбæстæйы сæраппонд сæ цард цы авд æфсымæры радтой, уыдоны сгуыхтытæ равдисынæн. Мадæн йæ фыртты фæлгонцтæ бацыдысты сæ цухъхъаты хуызы. Сæ ныхас у зæрдæбын, æргом кæны арф æнкъарæнтæ, мады æгæрон хъыг æмæ æнæмæлæт хъайтарты патриотизм.