Тақырыбы: "Таным шаттығы"

Сабақтың мақсаты:

Оқушылардың таным жолында жеткен өзіндік ізденістерінің жемісін шығармашылықпен қолдана алу және өзін – өзі танудың жалпы адамзат ғұмырындағы , жеке өмірдегі маңызы мен қажеттілігі туралы түсініктерін бекіту.

Сабақтың міндеттері:

- оқушылардың өзін – өзі тану сабақтарында жыл бойы алған білімдерінің нәтижесін тексеру;

-оқушылардың рухани адамгершілік құндылықтар туралы алған білімдерін шығармашылықпен пайдалана алу қабілеттерін дамытуға ықпал ету;

-оқушыларды өз еңбегінің жемісін шаттықпен тани алып , өзгелердің еңбегін орынды бағалай алуға тәрбиелеу.

Ресурстар:(құралдар, мәлiметтер)

Оқулық,дәптер,түрлі-түсті қалам,ақ қағаз

Сабақ барысы:

1.Ұйымдастыру кезеңі.

Тыныштық сәтi. « Нұрға бөлену»

Ыңғайланып отырыңыздар, денелеріңізді түзу ұстаңыздар. Аяқ-қолыңызды айқастырмаңыз. Қолыңызды тізеңізге немесе үстелге қоюға болады. Көздеріңізді жұмуларыңызды өтінемін.

Елестетіп көріңіз: Күн нұры сіздің төбеңізден өтіп, кеудеңізге қарай бойлап барады. Кеудеңіздің орта тұсында гүл түйнегі орналасқан. Гүлдің түйнегі нұрдан баяу ашылып келеді. Балғын және таза әсем гүл сіздің әр ойыңызды, әр сезіміңізді, эмоцияңыз бен тілек-қалауыңызды шайып, жүрегіңіздің қауызын ашты.

Нұр сәулесі сіздің бойыңызға ақырын тарай бастағанын елестетіңіз. Ол біртіндеп күшейе түсуде. Оймен осы нұрды қолдарыңызға түсіріңіз. Сіздің қолдарыңыз нұрға бөленіп, сәуле шашуда. Қолымыз тек жақсы, ізгі істер істейді және баршаға көмектеседі. Нұр аяқтарыңызға тарады. Аяқтарыңыз нұр сәулесін шашуда. Олар сізді тек жақсылық жасау үшін жақсы жерлерге апарады. Олар нұр мен махаббат құралына айналды.

Одан әрі нұр сіздің аузыңызға, тіліңізге тарады. Тіліңіз тек шындықты және жақсы, ізгі сөздер ғана айтады. Нұрды құлақтарыңызға бағыттаңыз, құлақтарыңыз тек жақсы сөз бен әсем әуенді ғана естиді. Нұр көздерімізге де жетті, көзіміз тек жақсыға қарап, бәрінен жақсылықты ғана көреді. Сіздің басыңыз түгелдей нұрға бөленіп, басыңызға тек ізгі, сәулелі ой келеді.

Нұр бірте-бірте қарқын және шұғылана бастайды, сіздің денеңізден шығып, жан-жағыңызға сәуле шашады. Осы нұрды туысқандарыңызға, мұғалімдеріңізге, достарыңызға, таныстарыңызға бағыттаңыз. Нұрды уақытша түсініспей, ренжісіп жүрген адамдарға да бағыттаңыз, олардың да жүрегі нұрға толсын.

Осы нұр бүкіл әлемге: барлық адамдарға, жан-жануарларға, өсімдіктерге, барлық тірі жанға таралсын... Ғаламның барлық түпкір-түпкіріне нұр бағыттаңыз. Ойша айтыңыз: «Мен нұрлымын... Нұр менің ішімде... Мен Нұрмын».

Осындай Нұр, Махаббат және Тыныштық күйінде отыра тұрыңыз...

Енді осы Нұрды жүрегіңізге орналастырыңыз. Нұрға толы бүкіл әлем сіздің жүрегіңізде. Оны осындай әсем қалыпта сақтаңыз.

Жаймен көзіңізді ашуға болады.

Рахмет.

Үнтаспа

Үй тапсырмасын тексеру

«Саятшы Ораз» С.Мұқанов 115 бет

1.Әңгімеде ата-баба дәстүрінің қай түрі туралы айтылған?

2.Саятшылықтың ата-баба дәстүрінің бірі екендігін қалай түсіндірер едіңдер?

3.Саятшының бойында қандай қасиеттер болуы керек деп ойлайсыңдар?

Жағымды ой-пікір. Дәйексөз.

«Өзін-өзі тану-рухани өркендеудің түп тамыры және адамгершілік құндылықтардың негізі.»

С.Алпысқызы

1.Нақыл сөздің мағынасын қалай түсінесіңдер?

2.Өзін-өзі тану сабақтарының маңыздылығы неде?

3.Өзіңді және өзгелнрді тани отырып, сендер қандай игіліктердің, құдылықтардың бар екендігіне көз жеткізіңдер?

Мұғалімнің сыйы:

«Әдепті сөз» Ә.Табылды

Асан атам: «Әдептілік сөзден білінеді. Әділет ағаңа ұқсап, әдепті сөзді үйреніп ал, балам»,- деп маған өсиет айтады.

Ағатайым институтта оқып жүр. Ол жақында каникулға келді. Мен оның әрбір ізетті, инабатты іс-қимылдарына назар аударып, әдепті сөздерін ұғып, жадымда сақтап, өзім де әдепті сөздерді қолдана бастадым.

Әділет ағатайым келем деген уақытынан кешігіп келді. Ол танадай көздерінен нұр шаша күлімдеп, атамды аймалай құшып амандасты:

- Кешіріңіз,ата,кешігіп келдім....

- Айыбы жоқ, балам,т«Жолаушының жолы біледі» деген.

-Ғафу етіңіз,Сізгетсыйлайтын сый-сыйяпатым да көңілдегідей емес.

- Оқасы жоқ,ботам! Маған инабатың мен ілтипатың бәрінен қымбат.

- Қош келдіңіз! Қуаныштымын, - дедім мен.

Ағатайым бетімнен сүйіп.

- Атамның тілін алып жүрсің бе? - деді.

- Маған сеніңіз,- дедім мен.

- Атасының жанашыр, қамқоршысы, күні ғой бұл жарығым! - деп, атам мені мақтай бастағанда,асыра мақтауды жөнсіз көріп, іштей қысылдым. Кейбір «еркелігім» есіме түсті.

Ағатайым шешеммен, әкеммен, аталарыммен кездескенде қандай әдепті сөздер айтады екен деп, оның әрбір қимылына , әсерлі сөзіне ықылас қойып, қасынан қалмай жүрмін.

1.Әңгіменің мағынасы қандай?

2.Әділет кімнен үлгі алып жүр?

3.Адамдармен қарым-қатынас жасауда әдептіліктің маңызы қаншалықты күшті?

Шығармашылық жұмыс:

«Өзін-өзі тану» пәнінен үйренгенім тақырыбында шығарма жазу.

Өзін-өзі тану хрестоматиясы

Топпен ән айту:

«Өз елім»

Сөзі Қ. Мырза-Әлидікі

Әні Н. Тілендиевтікі

Үй тапсырмасы:

«Ғажайып бақ» қазақ ертегісі 119-122 бет

Қорытынды:

«Әр адам»

Әр адамға барлау жасап күнімен,

Ой шарлайды, оймен бірге жүрегім.

Әр адамның өмірі бір хикая,

Әр адамның жүрегіне үңілем.

Бар мейірін бүкпей тура қараған,

Маған түрлі ой салады әр адам.

Гүл тәрізді күнге бойлап өсетін,

Әр адамның көзінен нұр, нәр алам.

Әр адамнан байқаймын мен бір ізді,

Қай із болсын, өзінше ол маңызды.

Жақсысы-үлгі, жаманы сақ жүргізер,

Әр адам маған бір-бір мектеп тәрізді.