Темперамент жөнүндө

Темперамент

Ибираим кызы Батма

Адам төрөлгөндө ал башкалардан сырткы келбети жагынан, боюнан, чачынын, көзүнүн түсүнөн ошондон эле өзүнүн темпераменти менен айырмаланат. Темперамент - бул адамдын ишмердүүлүгүндөгү нерв системасынын чагылдырылышы, психологиялык өзгөчөлүгү. Адамдар негизинен темпераменти жагынан төрт түргө бөлүнөт: сангвиник, флегматик, холерик, меланхолик.

• САНГВИНИК - эмоционалдуу, башкалардан ишке болгон жөндөмдүүлүгү менен айырмаланат. Ал өзүнө тааныш эмес чөйрөгө тез эле көнүп кетет, демилгечил, оптимист, мамилечил, айланасындагы адамдарга жакшы аура тартуулап турат. Ийгиликсиз нерселерге кабылса, аны оңой жеңип чыгат. Тынчы жок, жаңы таасирленүүлөргө муктаж болуп турат. Жумуштагы иштелип чыккан катуу тартипти сактай албайт, ушуга байланыштуу күчтү, чыдамдуулукту, көңүл бурууну талап кылган жумуштарды майын чыгара жасай албайт. Олуттуу максаты, терең ою болбогондуктан, чыгармачылык ишмердүүлүгү үстүртөн эле болуп калат.

• ФЛЕГМАТИК - абал курчуп турган учурда деле өзүн токтоо алып жүрөт, камаарабайт, шашпайт. Туруктуу, айтканынан кайтпаган көк, кандай учур болбосун, өзүн колго алганды билет. Жумуштун жоопкерчилигин өзүнүн алына жараша алат да, аны аягына чейин чыгарат. Адамдар менен мамиле түзүүдө баарына бирдей, куру эле сүйлөй бергенди жактырбайт.

• ХОЛЕРИК - башкалардан кескин чечим чыгаруусу менен, маанайынын тез-тез алмашып туруусу менен айырмаланат. Өзүн колго алууну билбейт, айланасындагылардын таасирлерине берилип, бир жумуштан экинчи жумушка оңой эле секирип кетет. Көңүл борборунда болууну жактырат. Холериктердин ички жашоосу жок болгондуктан, көп учурда аларды бат ачуулануу, өзүн кармай албоо, кызуу кандуулук сапаттары коштоп жүрөт.

• МЕЛАНХОЛИК - өзүнө ишенимсиз, тез чарчап, курулай шектенүүчүлүк сапатка ээ. Уяң, болбогон майда нерселер үчүн да кыжаалаттана берет. Жаңы адамдарга көнүшү кыйын. Кадимки шартта меланхолик - терең ойлуу, иштерман, өзүнүн жашоодогу милдеттерин ийгиликтүү аткарат. Ал эми ылайыксыз шартта ал түнт, коркок, тынчы жок адамга айланат. Маанайынын өзгөрүлүшүнүн себебин айланасындагылар оңойчулук менен аңдай алышпайт.