Проза. Мои сочинения

Шонді вотьыштіс вȍр сайȍ. А тȍлісь бытьтȍ сійȍ и видзчисис, шырк кайис кымȍр шȍрас. Сія бура тȍдȍ: гожумȍн сылȍн олан дженыт… Шонді гусясьȍ ни вȍр сайсянь, гильȍтȍ пятаэз.

Лягуша вȍрзьȍтіс природалісь ойся лȍньсȍ, сія кыйис ассис олан. Кытȍнкȍ ылын чирскис кȍбывка, сія тожȍ радуйтчис. Чом угȍлын ыш керис мича ныв да пымжыка жмитчис зон бердȍ. Вот и быдȍс олан гожся ойȍ.

Деревня пȍрис узьны. Őтік пȍрись баб куйліс ȍшын одзын и видзȍтіс пыдȍстȍм кымȍрȍ. Сы понда важын ни ȍшисȍ лун и ой. Тȍлісь серȍмтчис, бытьтȍ тȍдȍ баблісь кузь дума, но шы эз сет. Луннас позис лыддьȍтны баб чужȍмись уна, а ȍні тыдаліс, кыдз катыльтчис син угȍлісь пым да сȍдз шорок, мый кольччис быдȍс оланісь.

Сьȍд бандит.

Быдкодь отир олȍны миян деревняэзын, а вот тȍдвылȍ усьȍны нія, кȍдна важын мунісȍ мȍд мирас, но колисȍ татчȍ мыйкȍ шонытȍ, югытȍ.

Миян деревня гажа быд кадȍ. Пуксьȍм сія керȍс увтȍ, но не совсем гȍпȍ, кыдз баитȍ отир. Őні, конечно, быд ладорсянь пыкȍ вȍр. Чожа, навернȍ, пондам юклавны юр сувда сук турун, кошшыны кузь кыдззез да тшȍк баддез коласісь медбȍрья керкужуггесȍ. Вот сэтшȍм локтс олан…

А кȍркȍ Őльȍк гȍрасянь Пасȍнȍкȍдз вȍлі ȍтік ыб – синȍн он судзȍт. Юрын олȍны баббезлȍн висьттэз, кыдз весȍтлȍмась ыббез да видззез, кыдз лэдзȍмась сирньылȍм, шедтȍмась нянь кусȍк. Талун няньыс шедȍ кокнита, уналȍ киссьȍ кымȍрись кортȍг.

Вексȍ отирȍс вердс тшакȍн да ягȍдȍн вȍр. А деревня миян пуксьȍма ылȍ эта богатствосянь. Вот и ковсьывліс кошшыны сэтшȍм местаэсȍ. Челядь кадȍ чеччȍтлісȍ одз асылȍ и ыджыттэзкȍт онувья усим-талим турун, пыркȍтім лысва. Да эшȍ бы эта нем, ежели тшакья да ягȍда вȍлі год.

Вот и эта гожумȍ то ли тшак вȍл етша, то ли бур яг тшак коліс кошшыны ылісь вȍррезісь. Только вот пыр вȍлі тшак Матрен баблȍ. Кȍдзліс сія ли мый ли тшаксȍ? Может, морт сэтшȍм вȍлі, кȍда йылісь бȍра жȍ отир баитȍ: ош пантасяс и сійȍ гортȍ вайȍтас. Миян понда тшак абу, а Матрен баб ȍдва пестер кыскȍ. А кысь ваяс – некинлȍ оз висьтась, тшак плантация секретын видзȍ.

Только вот лун-мȍд ни пукалȍ гортын Матрен баб и тшакла оз мун. Локтȍм пȍ тшактȍг. А сэтшȍм йȍз гортын дыр оз пукав. Рытнас вуджис миянлань. Перыта пырис керкуȍ, чорыта гортчис: ашын пȍ тшакла муна да тэнȍ сьȍрам босьта. Мый сэтȍн ештан шуны, кȍр сідз жȍ визывтіс-петіс ни ыбȍс сайȍ, а менам только осьта ȍмȍ и видзȍтс бȍрас. Мыйкȍ, виднȍ, и быль вȍрас вȍлі, раз Матрен баб менȍ сьȍрас босьтȍ. Мам только радмис: мый тэ, ачыс Матрен баб яг тшакла нуȍтȍ. Чожа лȍсьȍтіс пестер, ашын пȍ некȍр лоас да тшȍктіс водны узьны. Чеччȍтіс одз асылȍн, а то коляс бабыс и яг тшакыс пышшас.

Мунім гусьȍн. Матрен баб етша баитіс и баснисис пышшаліс (этшȍмыс сыкȍт етша вȍвлі). Унажык дзарьясис одзȍ да бȍрȍ. Кȍр шорсȍ вуджим да кайыштім грива вылас, баб кежȍтіс туй вылісь нитшья местаȍ. Одзлань сё мунім гусьȍна. Места стрась тшакья, а тшак абу. Видзча ас кежам, муна баб сьȍрȍ, а сія мижьялȍ-мышкырасьȍ, а ачыс сё одзȍ-бȍрȍ видзȍтлȍ. Менам мыла бырис ветлȍтны: ȍтік и сісь тшак абу. Да эшȍ и нем бы, кȍр горш косьмȍ (челядь кадȍ мылякȍ горш стрась косьмис, юэс тȍкȍ и кошшим). Места югыт, гажа. Сэтчȍ Матрен баб чожа ме дын локтыштіс да гусьȍн шуȍ:

-Видзȍт, бȍра пуклȍ.

Ме эг вежȍрт кин, но повзи и видзȍта сыланьȍ, кытчȍ баб мыччалȍ.

-Видзȍт, видзȍт, эшȍ и куритȍ сьȍд паськȍма мужикыс.

Ме, конечно, нач повзи, но мужиксȍ кошши. Баб педзȍ, места оз адззы, чужȍм вылас вежсис.

Син вылȍ усис мыйкȍ сьȍд, только вот ме эг адззы мужиксȍ. Ачым жагȍна, но оськалі одзлань, а кȍр локтім нач зэв, то казялі сьȍд паськȍма бандитсȍ - ыджыт сотчȍм мыр. Вȍлись баб мезмис: ваксис-сераліс ас вылас быдса вȍр, навернȍ, кайез пышшисȍ ылȍ.

Гортȍ мунім горȍна да кокнита. Баб сераліс, висьтасис, кыдз сійȍ повзьȍтіс мырыс. Баблȍн меряйттȍм радость, а ме локті шуштȍм-гажтȍм: кыски пестер тыр страх да баблісь висьттэз. Лȍг петіс баб вылȍ: нуȍтс видзȍтны сьȍд мужиксȍ.