Тәрбияче нинди булырга тиеш?

Балачак - кеше тормышының иң мөһим чоры. Ул киләчәккә әзерләүдән тыш, бүгенге, якты, кабатланмас гомер. Балачак ничек үткән, сабыйны бу елларда кем җитәкләгән, әйләнә-тирәдә аның акылына һәм йөрәгенә нәрсә кергән - бүгенге сабыйның киләчәктә кем буласы шуңа бәйле. Шуңа күрә дә тәрбияче балаларны яратырга, алар тормышы белән, уй-хыяллары белән янып яши белергә тиеш. Тәрбия эше зур сабырлык, күңел юмартлыгы таләп итә торган озакка сузылган эшчәнлек. Шунлыктан, тәрбияче бик күп белергә, балалар өчен һәрчак кызыклы, кабатланмас булырга тиеш. Ә моңа эзләнүчән, белемеңне һәрчак баетып торганда, үз эшеңнең чын остасы булганда гына ирешергә мөмкин.