Салауатты отбасы

Сабақ мақсаты: оқушыларға салауатты отбасы туралы түсінік бере отырып, қиянат жасамау құндылығының мәнін ашу.

Міндеттері:

1. Салауатты отбасы туралы түсініктерін кеңейтіп, мейірімділік қасиетінің мәнін ашу

2. Отбасындағы салауаттылықты ұстануды ескере отырып, кешірімділік қасиетін дамыту

3. Оқушыларды мейірімділік, кешірімділік, қамқорлыққа тәрбиелеу.

Ресурстар:(құралдар, мәлiметтер)

«Өзін-өзі тану» оқулығы, 2-сынып. Авторлары: Оралбекова Ә.Қ., ӘлиевБ.Ш.,Ізғұттынова Р.О.- Алматы-2017

АҚТ қолдану, таныстырылым, ватман, А4 қағазы. суреттер, маркерлер.

Сабақ барысы:

1.Ұйымдастыру кезеңi. Тыныштық сәті.

«Су асты патшалығына саяхат»

Көзіңді жұмып, терең дем ал, денеңді босат. Бірнеше секундтан соң теңіз түбіне саяхат жасаймыз.

Теңіз жағасымен келе жатқаныңды елестет. Толқындардың жеңіл шалпылына, шағалалардың шуылына құлақ түр. Жалаң аяқтарыңмен құмды сезін. Шалғайдан қара нүкте көріп тұрсың: ол жақындаған кезде дельфин екенін түсіндің. Ол сені теңіз түбіне алып кету үшін келді. Ол өте әдепті екен, сені шыдамдылықпен күтіп тұр. Жайлап оның арқасына отыр, мықтап ұстап, жолға шықтыңдар. Дельфиннің арқасында жайланып отырып, өзіңді қауіпсіз сезін, су астында жүзу қандай керемет. Жан-жағыңа қара: мұнда кемпірқосақ тәрізді арлы-берлі жарқырай қалқыған әсем балықтар қаншама. Теңіз түбіне бойлаған сайын айнала қалайша өзгереді, суда тербелген қаншама ғажайып балдырлар. Қарашы, қандай орасан зор әдемі балықтар. Су асты неткен қызықты әрі ғажап әлем. Сен бір нәрсені байқадың ба? Мұнда неткен тұңғиық, толық тыныштық. Осы тыныштық күйде бол (бірнеше секунд үнсіз қалады).

Ал қазір жоғарыға, өз әлемімізге кері қайтуға дайындал. Айналаға жақсылып қара. Ғажап түстерге тағы бір рет қара және тыныштыққа құлақ түр. Осындай тыныштық саған самалдай әсер береді. Енді дельфин кері қарай жолға шықты. Сіз су бетіне шықтыңыз, жағаға жақындадыңыз. Дельфиннің арқасынан түсіңіз, оны сипалаңыз және осындай ғажап саяхатқа апарғаны үшін ризашылық білдіріңіз.

Сыныпқа оралыңыз және өз орныңызға келіңіз. Бірнеше секундтан соң көзіңізді ашыңыз, осы түйсінген тыныштықты өз бойыңызда сақтауға тырысыңыз.

- Оқушылар, тыныштық сәтінен қандай әсер алдыңыздар?

2.Үй тапсырмасын тексеру

№14-сабақ

«Аманатқа қиянат жасама» өсиет әңгімесі бойынша пікір алмасу.

Сұрақтар:

1. «Аманатқа қиянат жасама» өсиет әңгімесі не туралы айтылған?

2. «Аманатқа қиянат жасама» деген ұғымды қалай түсіндіңіздер?

Сабақ барысын талдау:

3. Дәйексөз

Дәйексөзбен танысу. Суреттер арқылы жасырылған дәйексөзді табуға тырысады.

Бір адам жаққан отқа,

Жүз адам жылынады.

Қазақ мақалы

3.1. Дәйексөзді оқыту (іштей кейін дауыстап оқиды)

3.2. Дәйексөзді дәптерге жазғызу (жатқа жазады)

3.3. Дәйексөздің мәнін ашу

- Мақалды қалай түсінесіздер?

4.Оқиғаларды әңгімелеу. Әңгімелеу

Бақытты отбасының сыры. Өсиет әңгіме.

Бір шағын қалада екі отбасы көрші тұрады. Бір отбасында үнемі ұрыс болады, ал екінші отбасында барлығы тату –тәтті өмір сүреді.

Бір күні бақытты отбасына қызығып жүрген екінші үйдің баласы олардың қалай өмір сүріп жатқанын білгісі келеді.

Сөйтіп, бір күні ол көрші үйге келіп, жасырынып, бақылап отырады.

Бақытты үйде барлығы әкесі, анасы, балалары да ылғи көңілді жүреді екен. Олар бәрін бірлесіп жасап жатыр. Анасы үйін тазалап жүріп бір құмыраны сүртіп тұр еді, кенеттен біреу телефон соғады. Ол құмыраны үстелдің шетіне қойып кетеді.

Анасына көмектесіп жүрген баласы бөлмедегі жаңағы құмыраны байқамай құлатып алады. Құмыра сынып қалады.

Бала «Міне қазір ұрыс басталады» деп ойлайды. Өйткені олардың отбасында осылай болушы еді.

Анасы оны көріп, ұлына:

- Кешір, балам. Мен кінәлімін. Мен оны дұрыс қоймадым.

- Жоқ, мен кінәлімін. Байқамай қалдым.

- Жарайды, ештеңе етпейді, бұл болмашы нәрсе,- дейді әкесі.

... Көрші бала оларға қызыға қарап, өз үйіне қарай жүгіре жөнеледі.

Анасы:

- Не болды, сонша жүгіріп, бірдеңе көрдің бе?

- Иә!

- Анашым, мен көршілердің бақытының сырын, олардың бізден ерекшелігін енді ұқтым.

- Олардың отбасында әркім өзін кінәлайды. Ал біздің отбасымызда әрқайсымыз «менікі дұрыс» дейміз....

Сұрақтар:

1. Өсиет әңгіме не туралы?

2. Неліктен бала бақытты отбасын сырттан бақылады?

3. Анасына көмектесіп жүрген бала неліктен өзін кінәлады?

4. Бақытты отбасы болу үшін оның мүшелері қандай қасиеттерге ие болу керек?

5. Сенің отбасың салауатты болу үшін бойыңдағы қандай қасиеттерді дамытар едің?

5.Шығармашылық іс-әрекет, топтық жұмыс.

5.1.Топқа бөлу.

Оқушыларды 4 топқа бөлу мейірімділік, кешірімділік, қамқорлық және

бауырмалдылық сөздері арқылы жүзеге асады.

5.2. Тапсырмалар

1-топ. Эссе жазу. «Менің отбасым қандай?»

2-топ. Кестені толтыр. Отбасындағы ана, әке, аға, әпке, сіңлі. қарындастың міндетін жаз.

3-топ. Ереже құрастыру. «Салауатты отбасы»

4- топ. Шағын әңгіме жазу. «Бақытты отбасы»

Тірек сөздер: жақсы ой, адал ниет, жақсы іс, көмек, қамқорлық, жанашырлық, сүйіспеншілік.

5.3. Тапсырмаларды жариялау, қорғау.

5.4. Шығармашылық жұмыс бойынша қорытынды.

Әр топ жүректі оригами арқылы жасап, жылы лебіздерін, мақтауларын жазып, шығармашылық жұмысты қорытындылайды.

6. Топпен ән айту. Жақсы адамдар

Сөзі: Талап Таймасұлы

Әні: Ерік Мұқамбетқалиев

Бабалар аманаты ұрпақтың ғаламаты

Бауырлар бірлігенде

Әулеттің саламаты, бауырым-ай

Қайырмасы:

Бауырым-ай сен екенсің

Бауырым-ай мерекемсің

Бауырым-ай берекемсің, бауырым-ай

Бауырым-ай тілегімсің

Бауырым-ай жүрегімсің

Бауырым-ай тірегімсің, бауырым-ай

Көрмесем сағынатын, қиналсам табылатын

Жаныма жылу беріп шырақ жағылатын, бауырым-ай

Қайырмасы:

Бауырым-ай сен екенсің

Бауырым-ай мерекемсің

Бауырым-ай берекемсің, бауырым-ай

Бауырым-ай тілегімсің

Бауырым-ай жүрегімсің

Бауырым-ай тірегімсің, бауырым-ай

7. Үй тапсырмасы

№ 16- 51-беттегі 2-тапсырманы орындау

№ 17- 56-беттегі «Қайырымдылық» мәтінін оқу

8. Сабақтың соңғы тыныштық сәті

- Бүгін сабақта өтілген тақырып туралы сәл ойланып көрейік.

Бақытты, салауатты отбасы атану жанұяның әрбір мүшесінің жан жүрегінің мейірімділікке, кешірімділікке және қамқорлыққа толы болуына байланысты.

Осы ойды жүректеріңізде сақтаңыздар.

Сабақ аяқталды. Рахмет.